वैभववाडी : वैभववाडी तालुका शिक्षण संस्था, मुंबई संचलित अर्जुन रावराणे विद्यालय, जयेंद्र दत्ताराम रावराणे सेमी इंग्लिश स्कूल आणि कै. हेमंत केशव रावराणे कनिष्ठ महाविद्यालयात सरस्वती पूजनाचा कार्यक्रम उत्साहात संपन्न झाला. संस्थेचे कार्याध्यक्ष जयेंद्र रावराणे यांच्या हस्ते विद्येची देवता सरस्वतीचे विधिवत पूजन करण्यात आले. विद्यार्थ्यांनी सादर केलेल्या पारंपरिक वारकरी भजनांमुळे शाळा परिसरात भक्तिमय वातावरण निर्माण झाले.

आज देशभर सरस्वती पूजनाचा माहोल आहे.तालुक्यातील रावराणे शिक्षण संकुलातही हा उत्सव भक्तिभावाने साजरा करण्यात आला. कार्यक्रमाच्या प्रारंभी माता सरस्वतीचे पूजन संस्थेचे कार्याध्यक्ष जयेंद्र रावराणे यांच्या हस्ते करण्यात आले. त्यानंतर विद्यार्थ्यांनी पारंपरिक वारकरी भजने सादर केली. सामूहिक आरतीतून विद्यार्थ्यांनी माता सरस्वतीप्रती श्रद्धा व्यक्त केली. वारकरी परंपरा आणि शैक्षणिक संस्कारांचा सुंदर संगम या कार्यक्रमातून साधला गेला. या कार्यक्रमाला प्रशालेचे मुख्याध्यापक बी. एस. नादकर, शिक्षक, शिक्षकेतर कर्मचारी, पालक आणि विद्यार्थी उपस्थित होते.