ठाणे : महाराष्ट्रातील ठाणे येथे बारावीत शिकणाऱ्या दोन विद्यार्थ्यांनी आपल्या १७ वर्षीय वर्गमित्राची हत्या केल्याची घटना समोर आली आहे. वाढदिवस साजरा करण्याच्या आणि बाईक खरेदी करण्याच्या इच्छेतून त्यांनी हे कृत्य केल्याचे सांगितले जात आहे. 

पोलिसांच्या माहितीनुसार, पीडित मुलाच्या अंगावरील सात ग्रॅम वजनाची सोन्याची साखळी चोरण्यासाठी त्यांनी ही हत्या केली. त्यानंतर, त्यांनी मृतदेह जाळून टाकण्याचा प्रयत्न केला आणि पोलिसांची दिशाभूल करण्याचाही प्रयत्न केला. आरोपींनी अलीकडेच 'दृश्यम ३' हा चित्रपट पाहिला होता आणि त्यातूनच प्रेरणा घेऊन त्यांनी हा गुन्हा घडवून आणला व पुरावे नष्ट करण्याची योजना आखली होती. 

दरम्यान, हे दोन्ही अल्पवयीन आरोपी ठाण्यातील आझाद नगरचे रहिवासी आहेत. पीडित मुलगा बेपत्ता झाल्यानंतर सुरू केलेल्या तपासानंतर कासारवडवली पोलिसांनी त्यांना अटक केली. त्यांच्यावर भारतीय न्याय संहितेच्या कलम १०३(१) (हत्या) आणि कलम २३८ (पुरावे नष्ट करणे) अंतर्गत गुन्हा दाखल करण्यात आला आहे.

पोलिसांनी दिलेल्या माहितीनुसार, पीडित मुलगा २४ सप्टेंबर रोजी संध्याकाळी ७ वाजण्याच्या सुमारास घरातून बाहेर पडला होता. परंतु तो परतला नाही. दुसऱ्या दिवशी त्याच्या वडिलांनी पोलिसात तक्रार दाखल केली. त्यानंतर अपहरणाचा गुन्हा दाखल करून तपास सुरू करण्यात आला.

बेपत्ता विद्यार्थ्याचा शोध घेण्यासाठी पोलिसांनी ८० ते ९० सीसीटीव्ही कॅमेऱ्यांमधील फुटेज तपासले. पोलिसांना या दोन अल्पवयीन मुलांच्या सहभागाचा संशय आला. त्यानंतर त्यांच्या मोबाईल फोनमधील डेटाचे विश्लेषण करण्यात आले आणि त्यांची अधिक कसून चौकशी करण्यात आली.

पोलिसांच्या म्हणण्यानुसार, गुरुवारी पुन्हा चौकशी केली असता, एका आरोपीने गुन्ह्याची कबुली दिली. त्याने दिलेल्या माहितीच्या आधारे पोलिसांनी मृतदेह शोधून काढला.

झोन-५ चे पोलीस उपायुक्त प्रशांत कदम यांनी सांगितले की, जरी या अल्पवयीन आरोपींना पुरावे नष्ट करण्याबाबतची 'प्रगत' समज होती, तरीही ते अभ्यासात कच्चे होते. प्राथमिक तपासातून असे दिसून येते की, मित्राचा वाढदिवस साजरा करणे आणि बाईक खरेदी करणे हा या गुन्ह्यामागचा मुख्य उद्देश होता.

पोलिसांच्या मते, 'दृश्यम ३' हा चित्रपट पाहिल्यानंतर त्यांनी हा कट रचला होता. या प्रकरणात दाखल कलमांनुसार पुढील कायदेशीर कारवाई सुरू आहे.