सावंतवाडी : विद्यार्थ्यांमध्ये वाचनसंस्कृती रुजविणे, ज्ञानाची जिज्ञासा वाढविणे आणि पुस्तकांशी मैत्री दृढ करणे, या उद्देशाने जिल्हा परिषद पूर्ण प्राथमिक शाळा, कोनशी येथे भारतरत्न डॉ. ए. पी. जे. अब्दुल कलाम यांच्या जयंतीनिमित्त १५ ऑक्टोबर रोजी वाचन प्रेरणा दिन विविध शैक्षणिक उपक्रमांनी उत्साहात साजरा करण्यात आला.

कार्यक्रमाच्या प्रारंभी भारताचे माजी राष्ट्रपती, थोर शास्त्रज्ञ आणि विद्यार्थ्यांचे प्रेरणास्थान डॉ. ए. पी. जे. अब्दुल कलाम यांच्या प्रतिमेस पुष्प अर्पण करून अभिवादन करण्यात आले. वाचन प्रेरणा दिनाचे औचित्य साधून शाळेत कथाकथन स्पर्धा, पुस्तक प्रदर्शन, सामूहिक वाचन आदी उपक्रमांचे आयोजन करण्यात आले. कथाकथन स्पर्धेत विद्यार्थ्यांनी विविध कथा आत्मविश्वासाने सादर केल्या. आवाजातील चढ-उतार, योग्य उच्चार आणि हावभाव यांच्या माध्यमातून कथांचे सादरीकरण करत विद्यार्थ्यांनी आपल्या भाषिक अभिव्यक्तीचे दर्शन घडविले. या उपक्रमामुळे विद्यार्थ्यांच्या कल्पनाशक्तीला चालना मिळाली, तसेच सर्जनशीलता आणि संवादकौशल्ये विकसित होण्यास मदत झाली.

पुस्तक प्रदर्शनातून विद्यार्थ्यांना विविध विषयांवरील पुस्तके, गोष्टींचे साहित्य, चरित्रे आणि ज्ञानवर्धक पुस्तकांची ओळख करून देण्यात आली. पुस्तकांमधून नवनवीन माहिती मिळविण्याची संधी विद्यार्थ्यांना मिळाली. सामूहिक वाचनाच्या उपक्रमात विद्यार्थ्यांनी एकत्रितपणे वाचनाचा आनंद घेतला. वाचलेल्या मजकुराचा अर्थ समजून घेणे, महत्त्वाचे मुद्दे लक्षात ठेवणे आणि स्वतःच्या शब्दांत विचार व्यक्त करणे, यासाठी विद्यार्थ्यांना प्रोत्साहित करण्यात आले. वाचनातून ज्ञान, ज्ञानातून प्रगती’ हा संदेश विद्यार्थ्यांपर्यंत पोहोचविण्याचा प्रयत्न या उपक्रमांतून करण्यात आला. नियमित वाचनामुळे शब्दसंग्रह समृद्ध होतो, आकलनशक्ती वाढते, एकाग्रता सुधारते आणि स्वतंत्र विचार करण्याची क्षमता विकसित होते. आजच्या डिजिटल युगात मोबाईलच्या वापरासोबत पुस्तक वाचनासाठीही नियमित वेळ देणे आवश्यक असल्याचे महत्त्व विद्यार्थ्यांना पटवून देण्यात आले.

डॉ. ए. पी. जे. अब्दुल कलाम यांचे जीवन विद्यार्थ्यांसाठी प्रेरणादायी आहे. ज्ञानाची ओढ, जिद्द, कठोर परिश्रम आणि मोठी स्वप्ने पाहण्याची वृत्ती यांमुळे व्यक्ती जीवनात मोठे यश संपादन करू शकते, हा त्यांच्या जीवनप्रवासातून मिळणारा संदेश आहे. विद्यार्थ्यांनी त्यांच्या विचारांचा आदर्श घेऊन नियमित वाचन करावे, ज्ञानाचा विस्तार करावा आणि आपल्या ध्येयाच्या दिशेने प्रयत्नशील राहावे, असे आवाहन करण्यात आले. कार्यक्रमाचे प्रास्ताविक व रूपरेषा पदवीधर शिक्षक डॉ. राजेंद्र चव्हाण यांनी सादर केली.

सूत्रसंचालन वेदांत बर्वे (इयत्ता सातवी) याने केले, तर आभार बापू गवस (इयत्ता सातवी) याने मानले. या उपक्रमाच्या यशस्वी आयोजनासाठी मुख्याध्यापक बाबुराव पास्ते, पदवीधर शिक्षक डॉ. राजेंद्र चव्हाण, उपशिक्षिका सौ. स्वाती देसाई, पोषण आहार मदतनीस सौ. सुविद्या गवस, शाळा व्यवस्थापन समितीचे अध्यक्ष सौरभ सिध्दये, उपाध्यक्ष सिद्धेश गावस आणि समितीच्या सदस्यांनी परिश्रम घेतले. तांबुळी केंद्राच्या केंद्रप्रमुख सौ. ज्योत्स्ना देसाई यांचे मार्गदर्शन शाळेला लाभत आहे.वाचनाची आवड, ज्ञानाची जिज्ञासा आणि पुस्तकांशी मैत्री निर्माण करण्याचा सकारात्मक संदेश देणारा हा उपक्रम उत्साहपूर्ण वातावरणात पार पडला.